Koläkçal - tähranlylaryň iň köp saýlaýan dag we tebigy gezelenç seýilgähi

Häzirki döwürde şäherde ýaşaýan we häzirki zaman durmuşynyň galmagalyndan ýadan adam üçin tebigat bilen içgin gatnaşykda bolmak zerur bolup durýar. Tebigata çykmak ruhy arassalaýar, adamy tebigy kökleri bilen baglanyşdyrýar. Eýranlylar tebigata gezelenje gitmegi aýratyn söýýärler. Dynç günlerinde şäherleriň daşyndaky seýilgählerde dürli ýaşdaky köp sanly adamyň tebigatda bolýandygyny görmek bolýar. Şäherleriň töweregindäki daglar tebigat söýüjiler üçin iň meşhur nokatlaryň biridir. Adatça köp taýýarlygy talap etmeýän, 1-2 sagatda çykyp bolýan daglar has köp islenilýär. Tähranda şeýle aýratynlyga eýe bolan birnäçe ýer bar, olaryň iň meşhurlarynyň biri hem Koläkçal bolup, ol Alborz daglarynyň bir bölegidir.

Koläkçal: aýratynlyklary we çykylýan ýollary

Koläkçalyň beýikligi 3350 metrdir. Onuň ýanynda beýikligi 3310 metr bolan dag depesi hem bar. Şeýle hem Tuçal dagyna eltýän “şa ýoly” diýip atlandyrylýan ýol hem Koläkçalyň üstünden geçýär. Jämşidiýe seýilgähinden çykylýan esasy ýol iň köp ulanylýan we iň owadan ýol bolup, oňa barmakda hiç hili kynçylyk ýokdur. Seýilgähiň özi 1850 metr beýiklikde ýerleşýär we iň ýokary depä çenli ýol takmynan 8 kilometrdir. Ilkinji dynç nokady “Şehit Bahonär okuwçy dynç-alyş merkezi” diýlip tanalýar. Ondan soň ýol Tuçal daglarynyň gerişlerine ýetýär. Bu ýerde ýol ikä bölünýär: gündogar tarapy Koläkçalyň depesine çykýar, demirgazyk tarapy bolsa Şirpäla gaçybatalgasyna barýar. Şirpäla gaçybatalgasy 2750 metr beýiklikdedir we Tuçal dagynyň esasy ýolunyň bir bölegi bolup durýar. Bu ýerden hem Koläkçala çykmak mümkin, ýöne ýol uzak we has kyn bolany üçin oňa isleg bildirilmeýär. Tähranyň Darabad sebitindäki Nilufär seýilgähinden başga bir ýol başlanýar. Bu ýol has çylşyrymly bolsa-da, depä çenli aralyk has gysga - takmynan 5200 metr. Bu ýolda ilki bilen beýikligi 2700 metr bolan Äräkçin, soňra bolsa 2800 metr bolan Tängçal depesine çykmaly bolýar. Soňra “Ab-e Zendegani” çeşmesine ýetilýär we şondan soň ýol depä çenli ýumşak bolýar. Darabad jülgesi arkaly çykylýan ýolda Koläkçala çenli “Käbutärhan”, “Çalmägäs” we “Sär-e Häft Howz” ýaly birnäçe şaglawukdan  geçilýär. Ondan soň “Halyl bagy” diýlip tanalýan tokaý meýdandan geçilip, “Darabad” depesi, “Piýazçal” gerşi we ahyrynda Koläkçalyň depesine ýetilýär. Şäheriň beýleki bir gadymy ýoly bolan Golabdere jülgesi-de depä çykmaga mümkinçilik berýär we onuň bir bölegi Jämşidiýe seýilgähiniň ýoluna birleşýär. Bu ýer ýabany alma we armyt agaçlary bilen meşhurdyr. Nur-äl-şähda depesi Koläkçal belentliginde 2569 metr beýiklikde ýerleşip, bu ýerde “Mukaddes goranyşyň” 8 näbelli şehidi 2001-nji ýylda (1380-nji hijri-şemsi ýylynda) jaýlanypdyr. Bu ýatlama merkezi her anna güni irden dagçylaryň ýygnanýan mukaddes nokady bolup, şol günler zyýaratçylara ýönekeý ertirlik hödür-kerem edilýär.

Koläkçal diýip atlandyrylmagy

Koläkçalyň adyny käbirler “garly çukurlaryň ýeri” diýip düşündirýärler. Ýöne başga bir rowaýata görä, bu adyň gelip çykyşynyň sebäbi şu nokadyň Tähran bilen Mazänderan welaýatlarynyň araçäginde ýerleşmegidir. Bu ýagdaýda: “Köläk” - çäk, araçäk, “çal” bolsa çukur, gowak manylary berip, adyň manysy “araçäk çukury” diýmekdir.

Koläkçal baradaky rowaýat

Käbir çeşmelerde Koläkçal bir ak döwiň öýi hökmünde ýatlanýar. Bu düşündiriş Mazänderanyň Koläkçal diýen beýikligine-de berilýär. Ak döw “Şanama” eserindäki rowaýatlarda, Eýranyň meşhur pälwany bolan Rüstemi ýeňen jyn hasaplanýar we ol Mazenderanda ýaşap geçipdir hem-de Eýranyň şasyny tussag edipdir diýip aýdylýar.

Koläkçal depesine ýakyn gezelenç ýerleri

Koläkçal özüniň gözel görnüşleri we aňsat ýollary bilen dagçylar we tebigat söýüjiler üçin ýörite ýer hasaplansa-da, onuň golaýynda hem görmeli ýerler köpdür. Megerem, olaryň iň esasylaryndan biri Jämşidiýe seýilgähi bolup biler. Koläkçala çykylýan esasy ýol şu ýerden başlanýar. Jämşidiýe - Tähranyň iň uly seýilgähleriniň biridir we onuň meýdany 10 gektardan ybarat. Seýilgähiň dürli bölekleri syýahatçylar üçin amatly dynç alyş we hyzmat ediş mümkinçilikleri bilen üpjün edilendir.