Kermanşah Güller bagy - ýer ýüzündäki uly bir surat

Adamlaryň ekerançylyk sungatyna eýe bolan döwründen bäri, onuň gözellige höwesi gülleri we bezeg ösümliklerini ösdürip ýetişdirmäge ýol açdy. Häzirki wagtda dünýäniň köp şäherlerinde dürli gülleri ösdürip ýetişdirmäge we görkezmäge niýetlenen baglar bar. Eýranyň günbatarynda ýerleşýän Kermanşah şäherinde hem “Kermanşah Güller bagy” atly uly bir bag ýerleşýär. Bu bag häzirki wagtda şäheriň meşhur gezelenç ýerleriniň biridir we her ýyl köp sanly syýahatçy ony synlamak üçin Kermanşah şäherine gelýär.

Kermanşah Güller bagynyň geografiýasy we taryhy

Kermanşah Güller bagyny döretmek pikiri ilkinji gezek 2012-nji ýylda (1391-nji hijri-şemsi ýylynda) öňe sürlüpdir. Iki ýyl dowam eden gurluşyk işlerinden soň bag ulanylyşa berlipdir. Kermanşahyň geografiýasy we onuň Zagros daglarynyň eteginde ýerleşmegi Güller bagynyň döredilmegine sebäp bolan esaslaryň biridir. Bu şäher orta derejeli daglyk howa şertine eýe bolup, taryh boýunça Eýranyň hökümdarlary we şalarynyň möwsümleýin mesgeni bolupdyr. Hatda taryhy çeşmelerde Kermanşah Sasany şalarynyň (III–VII asyrlar) ýaşaýyş ýerleriniň biri hökmünde agzalýar. Kermanşahyň ýyllyk ortaça temperaturasy 14°C bolup, ortaça ýagyş derejesi bolsa 456.8 mm-dir. Howanyň ýagdaýy we ýylylyk we çyglylygyň derejesi şäheriň töweregini örän hasylly çemenlik we tokaý bilen gurşalmagyna sebäp bolýar. Kermanşahy dört tarapdan belent daglar gurşap alýar, olaryň iň beýigi — 3357 metr beýiklikdäki “Paraw” dagydyr.

Güller bagynyň umumy meýdany 5,3 gektardyr. Bagyň içinde uly suw seýilgähiniň bolmagy bolsa “Eýran bagynyň” möhüm aýratynlygynyň direlip görkezilmegi bolup durýar. Eýran bagy häzirki wagtda dünýäde giňden tanalýar we onuň birnäçe nusgasy ÝUNESKO-nyň Bütindünýä mirasy sanawyna girizilendir. Kermanşah Güller bagynyň dizaýny bolsa, ýeriň ýüzünde ullakan göwrümli bir surat çekilen ýaly täsir galdyrýar.

Güller bagynyň bölümleri

Kermanşah Güller bagynyň dürli böleklerinde Eýrandan, Ýaponiýadan, Fransiýadan we Italiýadan getirilen güller we ösümlikler ösdürilip ýetişdirilýär. Bu bagy gezip göreniňizde dürli ýurtlara degişli takmynan 4 müň görnüşdäki ösümligi synlap bilersiňiz. Olaryň arasynda 300 görnüş agaç we 100 görnüş kaktus bar. Bagda ulanylýan tohumlaryň köpüsi niderland tohumlarydyr. Bagyň beýleki böleklerinde kaktus sergisi, birnäçe kiçijik köller, çemenlik depeleri, möwsümleýin güller, akwariýum, gaýaly bag we iňlis stilindäki bag ýerleşýär. Bagyň dürli ýerlerinde syýahatçylaryň dynç almagy üçin besetkalar gurlandyr. Besetkalarda oturyp dürli reňkli gülleri synlamak örän ýakymly duýguny döredýär.

Kermanşah Güller bagynda “köşk” diýlip atlandyrylýan bina we bir okuw merkezi hem bar. Okuw merkezinde dürli ösümlikleriň öwrenilmegi we dürli ylmy işleriň geçirilmegi üçin mümkinçilikler döredilen. Bagyň dörediliş maksadynyň esasy bölegi — ekologik medeniýeti ösdürmek bolandygy üçin, çagalar üçin hem aýratyn öwreniş meýdançasy döredilipdir.

Güller bagy Kermanşahyň günorta-günbatar bölegindäki “Kemerbend” ýolunyň ugrunda, Sina hassahanasynyň garşysynda ýerleşýär we giriş hemmeler üçin mugt. Aýratyn günlerde, syýahatçylaryň sany artanda, bagyň içinde ýörite ýolbelet güller we ösümlikler barada maglumat berýär. Bu sebäpden “Sadaf guşlar bagy” we “Şirin seýilgähiniň” hem golaýda ýerleşýändigi Güller bagynyň gezelenjini has-da gyzykly edýär. Olaryň içinde Sadaf guşlar bagy — Güller bagyndan 800 metr töweregi uzaklykda ýerleşýän, 2 gektar meýdany bolan we 2011-nji ýyldan bäri 130 görnüşden 30 müňden gowrak guşy özünde jemleýän Günbatar Aziýanyň iň uly guş merkezleriniň biri hasaplanýar.