Türkmenistanyň Bilim ministrliginiň halkara gatnaşyklary bölüminiň müdiri bilen duşuşyk geçirildi

2026-njy ýylyň 13-nji ýanwarynda, Eýran Yslam Respublikasynyň Türkmenistandaky ilçihanasynyň Medeniýet meseleleri boýunça geňeşçisi jenap Abdolreza Abbasi bilen Türkmenistanyň Bilim ministrliginiň Halkara gatnaşyklar bölüminiň müdiri hanym Gülnabat Gurdowa arasynda duşuşyk geçirildi.

Duşuşygyň başynda hanym Gülnabat Gurdowa Eýran Yslam Respublikasynyň Türkmenistandaky ilçihanasynyň Medeniýet meseleleri boýunça geňeşçisini mähirli garşy alyp, onuň Bilim ministrligine geleni üçin hoşallyk bildirdi. Ol Türkmenistanyň 1996-njy ýyldan bäri Eýran bilen ylym, bilim we medeniýet ulgamlarynda işjeň hyzmatdaşlyk alyp barýandygyny, iki ýurduň ýokary okuw mekdepleriniň arasynda köp sanly hyzmatdaşlyk ylalaşyklarynyň baglaşylandygyny belledi.

Hanym Gurdowanyň aýtmagyna görä, häzirki wagtda Türkmenistanyň 5 sany ýokary okuw jaýynda pars dili okadylýar, bu okuw jaýlarynda 20-ä golaý mugallym we professor pars dili boýunça sapak berýär, 400-den gowrak talyp bolsa bu dili öwrenýärler. Şeýle hem, iki halkyň umumy taryhy we medeni mirasy sebäpli, türkmen ýaşlarynyň pars dilini öwrenmäge bolan gyzyklanmasynyň barha artýandygyny nygtady.

Ol öňki ýyllarda Türkmenistanyň Bilim ministrligi we ýokary okuw jaýlarynyň Eýran Yslam Respublikasynyň Medeniýet merkezi bilen bilelikde edebi mirasyň beýik şahsyýetlerini hormatlamak, moda we milli geýim sergileri, sungat we miniatýura boýunça okuw sapaklaryny gurandygyny ýatlap, bu hyzmatdaşlyk üçin minnetdarlyk bildirdi. Şeýle çäreleriň 2026-njy ýylda has-da giňeldilmegine umyt bildirdi we Magtymguly adyndaky Türkmen Döwlet uniwersitetinde geçirilmegi meýilleşdirilýän hünär kämilleşdiriş okuw sapaklarynyň üstünlikli geçiriljekdigine ynam bildirdi. Şeýle-de, 2026-njy ýylyň Türkmenistanyň Prezidenti tarapyndan atlandyrylan «Garaşsyz, baky Bitarap Türkmenistan – bedew batly at – myradyň mekany» hökmünde möhüm ähmiýete eýe boljakdygyny belläp, Medeniýet merkeziniň tagallasy bilen fewral aýynda Eýrandan iki pars dili mugallymynyň gelip, türkmen mugallymlary we talyplary üçin okuw sapaklarynyň geçirilmeginiň örän oňyn başlangyçdygyny aýtdy.

Abdolreza Abbasi duşuşygyň guralandygy üçin minnetdarlyk bildirip, Türkmenistanyň we Eýranyň ýolbaşçylarynyň iki dostlukly ýurduň arasynda medeni gatnaşyklaryň ösdürilmegine berýän goldawy üçin minnetdarlyk bildirdi. Ol iki ýurduň arasynda medeni ugurlaryň köpdürlüdigini, şeýle-de bar bolan medeni ylalaşyklar esasynda ylym – bilim we ýokary okuw jaýlarynyň hyzmatdaşlygynyň giň mümkinçilikleriniň bardygyny belledi.

Medeniýet meseleleri boýunça geňeşçi Bilim ministrligi bilen Medeniýet merkeziniň arasynda has ýakyn aragatnaşygyň we hyzmatdaşlygyň zerurdygyny nygtap, pars dili boýunça iki eýranly mugallymyň gatnaşmagynda geçiriljek okuw sapaklarynyň Türkmenistanyň pars dili we edebiýatyny ösdürmek ugrunda möhüm başlangyçdygyny aýtdy. Şeýle sapaklaryň dowamly häsiýete eýe bolmagynyň zerurdygyny belledi.

Şeýle-de, pars dili boýunça mugallymlaryň we talyplaryň zerurlyklaryny has takyk kesgitlemek maksady bilen ýörite soragnamalarynyň taýýarlanylyp, ýokary okuw jaýlaryna Bilim ministrligi arkaly iberilendigini aýtdy.

Duşuşykda şeýle hem pars dili boýunça bilim derejesini ýokarlandyrmak, mugallym we talyp alyş-çalşygy, talyplar we mugallymlar üçin talyp haklary we ylmy mümkinçilikler, pars dili boýunça olimpiadalar, okuw maslahatlary, okuw kitaplaryny kämilleşdirmek we Eýran Yslam Respublikasynyň ylym we tehnologiýa günlerini Türkmenistanda geçirmek ýaly teklipler öňe sürüldi.

Duşuşygyň ahyrynda hanym Gülnabat Gurdowa hödürlenen teklipler üçin minnetdarlyk bildirip, uniwersitetler boýunça doldurylan soragnamalaryň Bilim ministrliginiň degişli hünärmeni tarapyndan Medeniýet merkezine iberiljekdigini aýtdy. Şeýle hem, käbir uniwersitetlerde pars diliniň birinji dil, käbirlerinde bolsa ikinji dil hökmünde okadylýandygyny, şonuň üçin talyplary derejelerine görä toparlara bölmegiň maksadalaýyk boljakdygyny belledi.

Duşuşygyň soňunda Medeniýet merkezi tarapyndan Magtymguly Pyragynyň diwanynyň iki tomluk terjimesi hanym Gülnabat Gurdowa sowgat hökmünde gowşuryldy. Öz gezeginde, hanym Gurdowa hem bu beýik şahyryň şygyrlar ýygyndysynyň iňlis dilinde terjimesiniň bir nusgasyny Medeniýet merkezine sowgat etdi.