Beýik Allanyň ady bilen   

​Nowruz baýramynyň gelmegi tebigatyň täzeden galkynmagynyň belent dabarasy bolup, ol ýer ýüzüniň täze örtüge beslenýän, ynsanyň bolsa öz ömür ýoluna çuňňur nazar aýlaýan pursadydyr. Nowruz - adamy wagtyň geçişi barada oýlanmaga, öz ruhy dünýäsine täzeden garamaga we Beýik Biribardan iň haýyrly özgerişleri dilemäge çagyrýan ylahy peşgeşdir. Bu özgeriş täze ýyl başlananda okalýan dogadaky «Ähsenul-hal» (iň gowy ýagdaýa gowuşmak) ynanjy bilen baglanyşyklydyr. Nowruzyň asylly däp-dessurlary ynsanyň kämilleşmäge we ylahy hikmetlere ýugrulan aýdyň ýolda täzelenmäge bolan gadymy isleginiň beýanydyr. Bu galkynyş we täzeleniş Allatagalanyň barlykdaky ebedi kanunydyr, Nowruz bolsa bu kanunyň tebigatdaky iň aýdyň görnüşidir.

​Täze ýyl pursatlarynda göwünler içki galkynyş umydy bilen bahar paslyny garşylaýan wagtynda, dürli halklar umumy duýgular arkaly biri-birine ýakynlaşýarlar we medeniýetleriň arasynda çuňňur baglanyşyk döreýär. Şoňa görä-de, Nowruz sebitdäki döwletleriň we halklaryň arasynda agzybirligiň hem-de ylhamyň binýady bolup biler. Nowruz däp-dessurlaryndaky nyşanlar diňe bir şahsy we jemgyýetçilik durmuşynda däl, eýsem halkara gatnaşyklarynda-da «gurujy özgerişiň» nusgasyny döretmäge ukyplydyr.

​Täze ýylyň gelmegi, adatça, dostluk, parahatçylyk we şatlyk buşlaýar. Emma şu ýyl eziz Eýranda bu günler söweş bilen gabat geldi. Adamzadyň duşmanlary tarapyndan halkymyza zor bilen dakylyp, amala aşyrylýan bu adalatsyz we wagşyçylykly söweş netijesinde Eýran topragynda Nowruz başga bir lybasa - gahrymançylyk, mertebe we durnuklylyk lybasyna büründi. Eýranyň gaýratly halkynyň, gerçekleriniň we esgerleriniň parahatçylygy bozýanlara garşy görkezen nusgalyk garşylygy bu ýurduň bakylygynyň syryny ýene bir gezek dünýä äşgär etdi we azatlyksöýüji halklaryň haýran galmagyna sebäp boldy. Bu söweşde adamzadyň duşmanlary Yslam Ynkylabynyň Beýik Ruhy Lideri Hezreti Aýatolla Ymam Hameneýini hem-de ýüzlerçe adamy, şol sanda Minabyň «Şejereýe Taýýebe» gyzlar mekdebiniň 168 sany okuwçysyny şehit edip, Eýran halkyny uly gussa batyrdylar. Şu gün tutuş Eýranda ABŞ-a we Sionistik režime garşy örän uly mukaddes gahar-gazap - zulma we basybalyjylyga hiç wagt boýun egmejek halkyň mertebesiniň we namysynyň nyşanydyr.

​Şu ýylky Nowruzyň söweş bilen utgaşmagy eýranlylaryň taryhy we medeni ýatkeşliginde hemişelik galar we şeýtanlara garşy gahrymançylykly göreşiň ýatlamasy bolar. Mundan beýläk bahar diňe bir ýylyň pasly däl, eýsem Eýran halkynyň imanynyň, agzybirliginiň we durnuklylygynyň nyşanydyr. Bu ýylky Nowruz diňe bir tebigatyň galkynyşynyň däl, eýsem halkara ulgamyndaky düýpli özgerişleriň, has gowy dünýäni gurmak ugrunda möminleriň öz Lideri - Yslam Ynkylabynyň üçünji Lideri bilen mukaddes baglanyşygynyň başlangyjydyr.

​Mundan başga-da, şu ýylky Nowruz baýramynyň Oraza baýramy bilen gabat gelmegi hem-de bu iki milli we dini däbiň bilelikde bellenilmegi musulman jemgyýetlerine möhüm habar berýär. Ýagny, Eýran halky öz dini ynançlaryna we gadymy däplerine esaslanyp, topragymyza göz diken duşmanlaryň öňünde öz gymmatlyklaryndan we ýörelgelerinden hiç wagt dänmez.

​Men ähli eziz watandaşlarymyzdan, aýratyn hem daşary ýurtlarda ýaşaýan eýranlylardan we Nowruz baýramyny belleýän halklardan bu gadymy däbi bellemek bilen bir hatarda, Eýranyň bigünä we kuwwatly halkynyň ýeňşi üçin doga-dileg etmeklerini haýyş edýärin. Beýik Allatagaladan täze ýylyň saglyk, rowaçlyk, bereket we ýeňiş getirmegini dileýärin. Goý, geljek ýyl Eýran we parahatçylyk hem-de ynsanperwerlik söýüji ähli halklar üçin agzybirligiň, ösüşiň we aýdyň geljegiň ýyly bolsun!

​Muhammet Mehdi Imanipur

Medeniýet we Yslam aragatnaşyklary guramasynyň müdiri