3-nji maýda, sişenbe güni,  Eýran Yslam Respublikasynyň Aşgabatdaky ilçihanasynyň ýanyndaky medeniýet merkezinde  pars dilini öwrenýän  okuwçylaryň we pars dili mugallymlaryň  gatnaşmagynda Mugallymlar güni mynasybetli we şehit Morteza Motahhariniň  hatyrasyna bagyşlanan dabara   geçirildi. Dabaranyň başynda Gurhany kerimden aýatlar okaldy.

Ilçihananyň  medeniýet meseleleri  boýunça  geňeşçisi  hem-de Sagdy  gaznasynyň  Türkmenistandaky  wekili  jenap  Nawid Rasuli ähli mugallymlary, ylaýta-da medeniýet merkeziniň  pars dili  mugallymlaryny mähirli gutlady we Eýranda mugallymlar gününi  bellemegiň pelsepesini we bu günüň  beýik mugallym Morteza Motahhariniň şehit bolmagynyň ýyl dönümine gabat gelýändiginiň  sebäbini düşündirip şeýle diýdi: “Mugallymlar güni  beýik mugallym, ýadawsyz göreşiji, görnükli alym we şerigat kanunlaryň bilermeni Morteza Motahhariniň hormatyna bellenilýär. Morteza Motahhari  1979-njy ýylyň 2-nji maýynda  Forkan terrorçylyk topary  tarapyndan öldürildi”.

Jenap Rasuli mugallymlarymyza aýratyn hormat goýmalydygymyzy we ene-atalarymyza nähili sarpa goýýan bolsak olara hem edil şolar  ýaly sarpa  goýmalydygymyzy belläp, çykyşyny dowam etdirdi: “Bizde bar  bolan ähli zat  mugallymlarymyzdan. Mugallymlar adamzadyň baýdak göterijileri we ýol görkezijileri. Mugallymçylyk hünäri şeýle  möhüm we gymmatly bolandygy sebäpli, bu hünäre  pygamberleriň hünäri diýip aýdylýar”.

Medeniýet meseleleri  boýunça  geňeşçi  ylymyň, bilimiň ähmiýetine  hem-de ylymlaryň ähli dinlerde we musulman dininde tutýan ornyna ünsi çekip,  şeýle diýdi: “Pygamberimiz (s.a.w) şeýle diýýär: "Adamlaryň berýän sadakalarynyň arasynda  ylymlary öwretmekden we bilim bermekden gymmatly  sadaka ýokdyr."

Sözüniň ahyrynda  Nawid Rasuli  medeniýet merkezinde  pars diliniň öwredilmegi barada  aýdyp, bu işiň ylma hyzmat etmek we iki döwletiň medeni mirasy bilen tanyşmak maksady bilen amala aşyrylýandygyny nygtady. Soňra  jenap Rasuli  okuwy guramak üçin şert döredýänleriň hemmesine we pars dilini öwredýän zähmetsöýer mugallymlara minnetdarlyk bildirdi.

Çäräniň dowamynda  pars dilini öwrenýän  okuwçylar mugallymy wasp edýän goşgulary we çeper eserlerden bölekleri, şeýle hem öz mugallymlary hakynda ýürekden ýazylan  düzmelerini  okadylar, bulardan başga-da dürli çykyşlar ýerine ýetirildi.

Mugallymlar güni mynasybetli geçirilen dabara süýji tagamlaryň  hödürlenmegi  we  medeniýet merkeziniň  bilim bölüminiň işgärlerine sowgatlaryň  gowşurylmagy  bilen tamamlandy.