28-nji aprelde, Remezan aýynyň 27-ne, penşenbe güni, Gadyr gijesi diýlip  hasaplanýan güni,  Eýran Yslam Respublikasynyň Aşgabatdaky ilçihanasynyň ýanyndaky medeniýet merkezinde mukaddes Remezan aýyna  bagyşlanan dabara geçirildi. Dabara käbir daşary ýurt ilçihanalarynyň diplomatlary, pars dilini öwrenýän  okuwçylar  we olaryň maşgalalary, eýran guramalarynyň Aşgabatdaky wekilýetleriniň işgärleri, ilçihananyň we  medeniýet merkeziniň işgärleri,  Aşgabatda ýaşaýan eýranlylar  we  Yslam dinini  söýüjileri  gatnaşdylar. Dabaranyň başynda Gurhany kerimden aýatlar okaldy.

Eýran Yslam Respublikasynyň Türkmenistandaky Adatdan daşary we Doly ygtyýarly ilçisi  jenap Golamabbas Arbab Hales ÝUNISEF-iň  Türkmenistandaky  wekilhanasynyň başlygyna, Palestina we Katar döwletleriň ilçihanalarynyň diplomatlaryna we beýleki myhmanlara hoş geldiňiz diýip, ýetip gelýän Oraza baýramy bilen dabara  gatnaşanlaryň hemmesini gutlady. Ilçi öz çykyşynda myhmanlaryň ünsüni Gurhanyň indirilen aýyň çäginde geçirilen Gurhan sergisine çekip, bu sungat sergisi pars dilini öwrenýän gadyrdan  türkmen okuwçylarynyň tagallalarynyň netijesi diýip  belläp geçdi.

Çykyşyny dowam etdirip, ilçi şeýle diýdi: “Sünni mezhebine görä Remezan aýynyň 27-si  Gadyr gijesi diýlip hasaplanýar. Mukaddes Remezan aýy mynasybetli  Eýranyň ähli şäherlerinde  Gurhan  sergileri gurnalýar”.

Jenap Arbab Hales sözüniň ahyrynda Yspyhanda geçirilen Halkara surat çekmek bäsleşiginde Türkmenistandan bäş çaganyň ýeňiş gazanandygy barada aýtdy.

Ilçihananyň  medeniýet meseleleri  boýunça  geňeşçisi  jenap  Nawid Rasuli, ruhy kämilligiň baýramy bolan – mukaddes Oraza baýramy bilen gutlap, Eýran Yslam Respublikasy bilen Türkmenistanyň arasyndaky medeni umumylyklara  ünsi çekdi we şeýle diýdi: “Mukaddes Remezan aýy, Oraza  we Gurban baýramlary  Eýranyň we Türkmenistanyň halklarynyň umumy baýramçylyklary bolup, iki ýurtda-da giňden bellenýär we dabaraly geçirilýär. Eýran Yslam Respublikasynyň Aşgabatdaky ilçihanasynyň ýanyndaky medeniýet merkezi şu  ýörelgä esaslanyp şu günki baýramçylyk dabarasyny  gurnady. Bu sergini geçirmek bilen, biz şuny aýtmak isleýäris, ýagny  mukaddes Oraza baýramy biziň halkymyzyň we Türkmenistanyň mähriban halkynyň umumy medeni gymmatlyklarynyň  biridir. Remezan aýy ähli musulmanlaryň ýüreklerini  biri-birine birleşdirýän aýdyr.   Türkmenistanda bolan wagtymyz  biz  özümizi öýde ýaly duýýarys we Taňrynyň bereket saçagynyň myhmany bolunýan  aýda Türkmenistanyň halky bilen bilelikde bu baýramçylygy belleýändigimize buýsanýarys”.

Dabaraň  dowamynda okuwçylar  tarapyndan taýýarlanan Remezan aýyna bagyşlanan wideoklip  görkezildi. Soňunda ÝUNISEF-iň  Türkmenistandaky  wekilhanasynyň başlygynyň, Palestina we Katar döwletleriň Ilçileriniň orunbasarlarynyň gatnaşmagynda kalligrafiýa we surat  bäsleşiginiň ýeňijilerine we  "Remezan aýy we Gurhanyň aýatlary”  atly wideoklipi  taýýarlan okuwçylara baýraklar gowşuryldy.