Marynyň Kemine adyndaky Döwlet drama teatrynda Türkmenistanyň we Eýran Yslam Respublikasynyň sungat ussatlarynyň bilelikdäki dostluk konserti geçirildi. 14-nji dekabrda Marynyň Kemine adyndaky Döwlet drama teatrynda Türkmenistanyň we Eýran Yslam Respublikasynyň sungat ussatlarynyň bilelikdäki dostluk konsertine Eýran Yslam Respublikasynyň Türkmenistandaky ilçisi jenap Ali Mojtaba Ruzbahaniniň, Eýran Yslam Respublikasynyň Türkmenistandaky Medeniýet meseleleri boýunça geňeşçisi Nawid Rasuliniň, Mary welaýat Medeniýet müdirliginiň başlygy Öwez Gylyjowyň, Türkmenistanyň Şekillendiriş muzeýiniň müdiri Orazow Ysmaýylyň, diplomatlaryň, Mary welaýatynyň ýaşaýjylarynyň gatnaşmagynda geçirildi. 

          Dostluk konsertinde Eýran Yslam Respublikasynyň Türkmenistandaky ilçisi jenap Ali Mojtaba Ruzbahani eýran halkynyň salamyny myhmansöýer türkmen halkyna ýetirip, şeýle diýdi: Eýran Yslam Respublikasy bilen Türkmenistanyň arasyndaky gatnaşyklar taryhy, medeni, siwilizasiýa umumylyklaryna, ýokary adamzat gymmatlyklaryna we ahlak däplerine esaslanýar. Bu umumylyklar, iki ýurduň ata-babalarynyň galdyran gymmatly mirasy bolup, iki ýurduň doganlyk gatnaşyklarynyň has-da berkemegine sebäp bolýar.

Ilçi sözüniň dowamynda Eýran Yslam Respublikasynyň Türkmenistanyň Garaşsyzlygyny we Bitaraplygyny ilkinji döwletleriň hatarynda goldandygyny belläp, türkmen halkyny hem Bitaraplyk baýramy bilen gutlap sözüni dowam etdi: Umuman iki ýurduň arasyndaky hemmetaraplaýyn we doganlyk gatnaşyklarynda medeni hyzmatdaşlygyň aýratyn orny bolup, ähli ugurlardaky gatnaşyklaryň has-da ilerlemegine ýardam etýär. Maryda Eýran Yslam Respublikasynyň we Türkmenistanyň bilelikdäki konserti we amaly – haşam eserleriniň sergisini geçirmek iki ýurduň arasyndaky gatnaşyklary ösdürmek üçin edilýän tagallalaryň mysalydyr.

          Eýran Yslam Respublikasynyň Türkmenistandaky ilçisi sözüniň soňunda Türkmenistanyň hormatly Prezidentine, türkmen halkynyň milli liderine we Halka Maslahatynyň başlygyna medeniýet ugrunda hyzmatdaşlygyň has-da berkidilmegi üçin döredip berýän mümkinçilikleri üçin sag bolsun aýtdy. 

Mary welaýat Medeniýet müdirliginiň başlygy Öwez Gylyjow şu ýylyň adynyň “Arkadag Serdarly Bagtyýar ýaşlar” ýyly diýip yglan edilenligine ünsi çekip, Türkmenistanyň we Eýran Yslam Respublikasynyň ýolbaşçylarynyň tagallalary bilen şu ýylda iki ýurduň arasynda köp sanly medeni çäreleriň bilelikde geçirilenligini aýtdy.

Ol sözüni dowam etdi: ýurtlaryň arasyndaky gatnaşyklary we dostlugy dowam etdirmekde medeniýet möhüm rol oýnaýar. Medeniýet we sungat halklaryň arasyndaky dildir we biri-birleri bilen onuň üsti bilen düşünüşýärler. Aslynda medeniýet we sungat halklaryň arasynda dostluk döredýär we olary biri-birine ýakynlaşdyrýar.

Mary welaýat Medeniýet müdirliginiň başlygy sözüniň soňunda türkmen halkynyň milli lideri Gurbanguly Berdimuhammedowyň kitaplaryna we medeniýet barada aýdanlaryna ünsi çekip şeýle diýdi: Medeniýet bu derýa kimin döwletleriň aragatnaşygynyň has-da berkemegine sebäp bolýandyr.

“Zendegiýe aýiniýe Mazändäran” saz toparynyň we Türkmenistanyň sungat ussatlarynyň çykyşy konserte gatnaşýanlar tarapyndan gyzgyn garşy alyndy.

Şuny belläp geçmek zerurdyr, Eýranyň we Türkmenistanyň dostluk konserti 15-nji dekabrda Marynyň Kemine adyndaky Döwlet drama teatrynda geçiriler.