Magtymguly adyndaky dil, edebiýat we golýazmalar institutynyň başlygy Dawut Orazsähedow bilen duşuşyk geçirildi

2026-njy ýylyň 15-nji ýanwarynda, Eýran Yslam Respublikasynyň Türkmenistandaky ilçihanasynyň Medeniýet meseleleri boýunça geňeşçisi jenap Abdolreza Abbasi Türkmenistanyň Ylymlar akademiýasynyň Magtymguly adyndaky Dil, edebiýat we golýazmalar institutynyň başlygy jenap Dawut Orazsähedow bilen duşuşdy. Duşuşygyň başynda jenap Dawut Orazsähedow medeniýet geňeşçisini mähirli garşy alyp, institutynyň ýolbaşçy düzümi bilen tanyşdyrdy. Şeýle-de, institut başlygynyň orunbasary jenap Hezretguly Durdyýew we pars dili boýunça ylmy işgär-terjimeçi jenap Güýçmyrat Çangliýew tanyşdyryldy.

Institut ýolbaşçysy çykyşynda Magtymguly adyndaky Golýazmalar institutynyň 1926-njy ýylda esaslandyrylandygyny we 2026-njy ýylyň bu ylmy edaranyň döredilmeginiň 100 ýyllygyna gabat gelýändigini belledi. Institut beýik türkmen akyldary we şahyry Magtymguly Pyragynyň adyny göterýär we bu şahsyýet Eýran bilen Türkmenistanyň umumy medeni mirasynyň möhüm bölegidir.

Şeýle-de, 2019-njy ýylda Pars dili we edebiýaty boýunça institutyň Magtymguly adyndaky golýazmalar institutyna birleşdirilendigi, häzirki wagtda bu ylmy merkezde 200-e golaý işgäriň işleýändigi we 1000-den gowrak ylmy işgär bilen hyzmatdaşlyk edilýändigi aýdyldy.

Institutda 8 bölüm, 2 dil bölümi, 3 edebiýat bölümi, 3 golýazmalar we gadymy dillerden terjime ugurlary boýunça bölümler, şeýle-de golýazmalary dikeltmek we fonetika boýunça enjamlaşdyrylan iki barlaghana hereket edýär. Häzirki wagtda bu ýerde 12 müňden gowrak golýazma saklanylýar, olaryň 4 müňe golaýy pars dilindedir.

Duşuşykda institut tarapyndan üç dilde – türkmen, iňlis we rus dillerinde neşir edilýän «Miras» atly ylmy žurnala eýranly alymlaryň makalalarynyň kabul edilýändigi hem nygtaldy.

Jenap Abdolreza Abbasi öz çykyşynda Türkmenistanyň ýolbaşçylaryna, hususan-da, Türkmenistanyň Prezidenti Serdar Berdimuhamedowa we Türkmen halkynyň Milli Lideri Gurbanguly Berdimuhamedowa iki ýurduň arasynda medeni hyzmatdaşlygy goldaýandyklary üçin minnetdarlyk bildirdi. Şeýle hem Täze ýyl bilen gutlap, 2026-njy ýylyň Türkmenistanyň Prezidenti tarapyndan «Garaşsyz, baky Bitarap Türkmenistan – bedew batly at – myradyň mekany» diýlip yglan edilendigini belläp, bu ýylda bilelikdäki medeni çäreleri geçirmäge taýýardyklaryny beýan etdi.

Taraplar Eýran bilen Türkmenistanyň arasyndaky umumy taryhy-medeni gatnaşyklary, bar bolan medeni ylalaşyklary we ylmy hyzmatdaşlyk mümkinçiliklerini ara alyp maslahatlaşdylar. Şeýle-de, Magtymguly Pyragy barada bilelikdäki dokumental film döretmek, golýazmalar boýunça hünärmenleri alyşmak, bilelikdäki sergileri guramak, ylmy neşirleri we sözlükleri taýýarlamak ýaly teklipler öňe sürüldi.

Jenap Dawut Orazsähedow tekliplere ýokary baha berip, 2026-njy ýylyň maý aýynda Tähranda geçiriljek Halkara kitap sergisine gatnaşmak we Eýranyň milli kitaphanalaryna baryp görmek boýunça taýýardygyny beýan etdi. Şeýle-de, pars-türkmen sözlüginiň üstünde alnyp barylýan işlerde eýranly alymlar bilen hyzmatdaşlyga taýýardygyny aýtdy.

Duşuşygyň ahyrynda institut başlygynyň orunbasary jenap Hezretguly Durdyyew, şeýle duşuşyklaryň medeni gatnaşyklaryň ösmeginde möhüm ähmiýete eýedigini nygtady we hyzmatdaşlygyň dowam etdirilmeginiň zerurdygyny belledi.

Duşuşygyň soňunda taraplar özara ýadygärlik sowgatlaryny alyşdylar we medeniýet geňeşçisi institutyň golýazmalary dikeltme we sanly ulgam bölümleri bilen tanyşdy.