EYR-nyň Türkmenistandaky ilçihanasynyň Medeniýet merkezinde Yslam Ynkylabynyň Şehit Lideriniň jaýlanmagynyň 7-si mynasybetli "Eýran we Yslam üçin janyny pida eden Şehit Ymam Hameneýini ýatlamak" çäresi geçirildi

EYR-nyň Türkmenistandaky ilçihanasynyň Medeniýet merkezinde 1405-nji ýylyň tir aýynyň 25-ine (2026-njy ýylyň iýul aýynyň 16-syna) penşenbe güni sagat 18:00-19:30 aralygynda Yslam Ynkylabynyň Şehit Lideriniň jaýlanmagynyň 7-si mynasybetli "Eýran we Yslam üçin janyny pida eden Şehit Ymam Hameneýini ýatlamak" çäresi geçirildi.

Bu çärä EYR-nyň Türkmenistandaky ilçisi Aly Mojtaba Ruzbehani, EYR-nyň Türkmenistandaky ilçihanasynyň medeniýet meseleleri boýunça geňeşçisi Abdolreza Abbasi, Aşgabadyň aksakgal ýaşulylary, Ýyldyz saýtynyň we žurnalynyň esaslandyryjysy hem-de bloger we habarçy Hojamuhammedowa Bahar, "Owadan Dünýä Syýahat" syýahatçylyk kärhanasynyň wekili Daniýel, Türkmenistanyň KHBS-nyň wekilleri, Medeniýet merkeziniň mugallymlarydyr pars dili öwrenijileri we olaryň maşgalalary, Türkmenistanda ýaşaýan we işleýän eýranlylar we olaryň maşgalalary gatnaşdylar.

Bu çäräniň başynda Medeniýet merkeziň 10-njy kurs okuwçysy Yslam Işangulyýew Gurhany Kerimden matam aýatlaryny okady we soňra türkmen matam däplerine görä türkmen mollalaryndan biri doga – dilegler etdi.

Çäre Abdolreza Abbasiniň hem-de Aly Mojteba Ruzbehaniniň çykylary bilen başlap, Ymam Hameneýiniň şehitligi we onuň jaýlanmagy bilen bagly birnäçe wideoşekiller hem-de Medeniýet merkeziň mugallymlardyr pars dili öwrenijileriniň ýerine ýetirmeginde makalalar bilen dowam edip, hödür-kerem bilen jemlendi.

• EYR-nyň Türkmenistandaky ilçihanasynyň medeniýet meseleleri boýunça geňeşçisi Abdolreza Abbasiniň çykyşy

Beýik Allanyň ady bilen! Hormatly myhmanlar, gadyrly mugallymlar we pars dili öwrenijiler, eziz kärdeşler. Sözümiň başynda hemmäňize, aýratyn hem şu günki çärämize gatnaşýan Eýran Yslam Respublikasynyň Türkmenistandaky hormatly Ilçisine tüýs ýürekden hoş geldiňiz diýýärin. Eýran Yslam Respublikasynyň Türkmenistandaky Ilçihanasynyň Medeniýet merkezinde geçirilýän Eýran Yslam Ynkylabynyň şehit bolan Lideri, Ymam Hameneýiniň ýagty ýadygärligini hatyralamak dabarasyna gatnaşýandygyňyz üçin hemmäňize tüýs ýürekden hoşallygymy bildirýärin. Beýik Biribar Gurhany Kerimiň «Äli-Imran» süresiniň 170-nji aýatynda şeýle diýýär:

«Olar Allanyň Öz kereminden beren nygmatlaryna begenýärler. Özlerinden soň heniz olara goşulmadyk imanlylara bolsa, olar üçin hiç hili gorkynyň we gam-gussanyň bolmajakdygy barada hoş habar berýärler.»

Şeýle hem, «Nisa» süresiniň 69-njy aýatynda Beýik Biribar şeýle buýurýar:

«Kim Alla we Onuň Resulyna boýun bolsa, olar Alla tarapyndan nygmat berlen pygamberler, dogruçyl bendeler, şehitler we salyh adamlar bilen bile bolarlar. Olar nähili ajaýyp ýoldaşlardyr!»

Biz ähli şehitleriň päk ruhlaryna, şehitleriň Ymamyna we Yslamyň beýik ymmatynyň şehit bolan beýik Lideri Hezreti Aýatolla Hameneýiniň mübärek ruhuna tagzym ýetirýäris. Hakykatdan-da, olar Gurhanyň bu mübärek aýatlarynda beýan edilen beýik mertebä mynasyp bolan şahsyýetlerdir.

Hormatly çärä gatnaşyjylar, eziz myhmanlar!

Soňky iki hepdäniň dowamynda Eýran Yslam Ynkylabynyň şehit bolan Ýolbaşçysy bilen hoşlaşyk, jaýlanyş we soňky ýoluna ugratmak çäreleri barada Tährandan başlap Kum, Näjäf, Kerbela we mukaddes Maşada çenli geçirilen çäreleriň habarlaryny, suratlaryny we wideoşekillerini hemmäňiz diýen ýaly görensiňiz.

Bu dabaralar adaty matam ýa-da ýas çäresinden has giň     many-mazmuna eýe bolup, ynsanperwer, medeni, syýasy, jemgyýetçilik we diplomatik ölçegleri özünde jemlän köptaraply taryhy waka öwrüldi. Bu wakany soňky ýyllarda Eýranyň asylly halkynyň hem-de dünýäniň azatlyk söýüji adamlarynyň jemgyýetçilik jebisligini we halky birleşdirmek ukybyny aýdyň görkezýän iň möhüm taryhy pursatlaryň biri hökmünde bahalandyrmak bolar. Halkyň bu çärelere örän giň gerimde gatnaşmagy we daşary ýurtlardan gelen köpsanly ýokary derejeli wekiliýetleriň gatnaşmagy bu wakanyň diňe Eýranyň milli çäklerinde däl-de, eýsem tutuş sebit derejesinde hem uly seslenme döredendigini görkezdi.

Ýurduň içinde bolsa, dürli şäherlerde millionlarça adamyň bu dabaralara gatnaşmagy Eýran Yslam Respublikasynyň diňe goranyş kuwwaty we harby saklaýyş mümkinçilikleri ýaly güýç serişdelerine däl, eýsem jemgyýeti jebisleşdirmekde we halky bir maksat ugrunda birleşdirmekde hem örän uly mümkinçiliklere eýedigini ýene bir gezek subut etdi.

Şeýle hem, onlarça resmi wekiliýetiň, döwlet Baştutanlarynyň, Prezidentleriň, premýer-ministrleriň, parlament ýolbaşçylarynyň we dürli döwletlerden gelen başga-da ýokary derejeli ýolbaşçylaryň bu dabaralara gatnaşmagy, soňky çylşyrymly howpsuzlyk ýagdaýlaryna we uruşlardan soňky şertlere garamazdan, Eýranyň sebitdäki möhüm ornunyň saklanyp galýandygyny aýdyň görkezdi.

Türkmen halkynyň Milli Lideri, Türkmenistanyň Halk Maslahatynyň Başlygy, hormatly Gurbanguly Berdimuhamedowyň şehit bolan Lidere hormat goýmak dabarasyna gatnaşmagy örän uly hormata we ýokary baha berilmäge mynasyp ädim boldy. Şu mynasybetli, hormatly jenap Gurbanguly Berdimuhamedowa, onuň ýolbaşçylygyndaky wekiliýete, şeýle hem dostlukly türkmen halkyna Eýranyň beýik halkynyň hasratyny paýlaşandyklary we doganlyk raýdaşlygyny görkezendikleri üçin tüýs ýürekden hoşallygymy bildirýärin.

Ynkylabyň şehit bolan Ýolbaşçysynyň Eýranyň asylly halkyna we dünýäniň ähli azatlyk söýüji halklaryna eden iň soňky wesýetleriniň biri Gurhany Kerimiň «Äli-Imran» süresiniň 139-njy aýaty boldy.

Beýik Biribar şeýle buýurýar:

«Ejizlemäň we ruhdan düşmäň! Eger hakykatdan hem iman eden bolsaňyz, onda siz üstünsiňiz.»

Şehit Liderimiz bu aýatyň düşündirişinde, ony hemişe özüniň iň esasy we gaýtalap nygtaýan gurhançylyk ýörelgeleriniň biri hökmünde beýan edip, şeýle diýýärdi: «Bu aýat duşmanyň öňünde gurluş taýdan ejizlige we ruhdan düşmäge garşy gönükdirilen Gurhan buýrugydyr. Ol bize imanyň ynsana mertebe berýändigini, howplaryň garşysynda berk durmagyň zerurdygyny we hak tarapyň hökman ýeňiş gazanjakdygyny ýatladýar.»

Yslam Ynkylabynyň Beýik Ýolbaşçysy Hezreti Aýatolla Seýit Mojtäba Hameneýi hem «Eýranyň Şehidi» diýlip atlandyrylan beýik şahsyýetiň jaýlanyş dabaralary tamamlanandan soňra beren resmi ýüzlenmesinde Eýran bilen Yragyň onlarça million ilatynyň gahrymançylykly we görlüp-eşidilmedik derejedäki gatnaşygyna tüýs ýürekden minnetdarlyk bildirdi.

Ol öz ýüzlenmesinde «Ymmatyň Şehit Ymamy» barada şeýle diýdi:

«Ol Hüseýin ýaly şahsyýetdi, Hüseýin ýaly pikir edýärdi,

Hüseýin ýaly hereket edýärdi we Hüseýin ýaly ömür sürdi.»

Biz hem şehit Lidere we Eýranyň gahryman şehitleriniň eziz we sabyrly maşgalalaryna çuňňur gynanç bildirip, Beýik Liderimiziň görkezmelerine wepaly bolup, bu şehitleriň ýoluny hak ýeňiş gazanýança we batyl dolulygyna ýok edilýänçä dowam etdirjekdigimize kasam edýäris we Beýik Biribardan Ynkylabyň şehit bolan Lideriniň päk we mukaddes ruhuna iň belent derejeleri, şeýle hem onuň Hezreti Muhammet pygamber (s.a.w) we onuň päk maşgalasy bilen ýoldaş bolmagyny dileýäris.

Sözümiň ahyrynda, Eýranyň ýolbaşçylary we halky bilen gynanjy paýlaşandyklary, şeýle hem Eýran bilen Türkmenistanyň arasyndaky çuňňur dostluk we doganlyk gatnaşyklaryny aýratyn nygtandyklary üçin iki ýurduň hormatly ýolbaşçylaryna, aýratyn hem Türkmenistanyň hormatly Prezidenti jenap Serdar Berdimuhamedowa hem-de Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa tüýs ýürekden hoşallygymy bildirýärin.

Goý, Beýik Biribar olara berk jan saglyk, uzak ömür we alyp barýan döwlet ähmiýetli işlerinde täze üstünlikleri nesip etsin.

• EYR-nyň Türkmenistandaky ilçisi Aly Mojtaba Ruzbehaniniň çykyşy

Beýik Allanyň ady bilen! Salam, hormatly pars dili öwrenijileri, eziz mugallymlar, gadyrly çärä gatnaşyjylar. Sözümiň başynda Eýran Yslam Ynkylabynyň şehit bolan Lideriniň ýagty ýadygärligini hormat bilen hatyralaýarys we mukaddes garşylyk hereketiniň belent mertebeli şehitleriniň ruhuna tagzym edýäris. Şu günki ýatlama çäresi bütin ömrüni adalata, hakykata we durnukly göreşe bagyş eden beýik şahsyýetiň hormatyna bagyşlanýar. Onuň zähmet çeken we gündelik durmuşyny geçiren ýerinde şehit bolmagy, halk bilen bile ýaşaýan sada durmuşynyň, gaýduwsyzlygynyň we berk ynanjynyň aýdyň nyşanyna öwrüldi. Bu gymmatly miras mundan beýläk hem azatlyk söýüjiler üçin ýol görkeziji bolup galar.

Onuň millionlarça adamyň gatnaşmagynda Tährandan başlap, mukaddes Kum şäheriniň ruhy köçelerinde, Näjäf we Kerbela şäherlerinde we soňunda Maşatdaky Ymam Ryzanyň (a.s.) aramgähinde geçirilen taryhy hoşlaşyk çäreleri halk bilen onuň beýik maksatlarynyň arasyndaky berk we üzülmez baglanyşygyň aýdyň beýany boldy. Bu beýik jebislik dünýäniň ähli azatlyk söýüjileriniň kalbyna täze ruh, täze joşgun berdi hem-de olary hakykat we adalat ugrundaky göreşini öňküsinden hem has berk dowam etdirmäge ruhlandyrdy.

Hormatly myhmanlar!

Häzirki wagtda jemgyýeti dolandyrmagyň täze döwrüniň başlanmagy bilen bu jogapkärli wezipäniň onuň Alyhezreti Aýatolla Seýit Mojtäba Hameneýiniň mynasyp ellerine tabşyrylmagyna örän şatdyrys. Biz onuň parasatly ýolbaşçylygynda ösüş ýolunyň üstünlikli dowam etjekdigine hem-de Eýran bilen goňşy döwletleriň, aýratyn-da dostlukly we doganlyk Türkmenistan bilen ähli ugurlardaky ikitaraplaýyn gatnaşyklarynyň has-da çuňlaşjakdygyna berk ynanýarys.

Sözümiň ahyrynda, iki ýurduň Prezidentleri jenap Masud Pezeşkiýan bilen jenap Serdar Berdimuhamedowyň özara hyzmatdaşlygy ösdürmek ugrunda edýän yzygiderli tagallalaryna tüýs ýürekden hoşallygymy bildirýärin. Şeýle hem Türkmen halkynyň Milli Lideri, Türkmenistanyň Halk Maslahatynyň Başlygy, Gahryman Arkadag Gurbanguly Berdimuhamedowa Tähranda geçirilen hoşlaşyk dabarasyna gatnaşyp, doganlyk duýgusy bilen gynanjyny paýlaşandygy üçin çuňňur minnetdarlygymy beýan edýärin. Bu gymmatly raýdaşlyk, iki halkyň arasyndaky dost-doganlyk gatnaşyklarynyň taryhyň çuňluklaryna we halklarymyzyň kalplaryna daýanýandygyny ýene bir gezek aýdyň görkezdi.

Şehit bolan Beýik Ýolbaşçynyň ruhunyň şat bolmagyny, Eýran bilen Türkmenistanyň arasyndaky doganlyk gatnaşyklarynyň bolsa barha berkäp has-da rowaçlanmagyny arzuw edýärin. Üns berip diňländigiňiz üçin sag boluň!

• Çärede ýerine ýetirilen Medeniýet merkeziň mugallymlarydyr pars dili öwrenijileriniň makalalary

EYR-nyň Türkmenistandaky ilçihanasynyň Medeniýet merkeziniň mugallymy Nurnabat Täjiýewa

Hormatly myhmanlar, akyldarlar we söýgi hem-de ynam mekdebiniň wekilleri! Size tüýs ýürekden salam we hormatymy ýetirýärin. Men şu gün dostlukly hem-de doganlyk Türkmenistan topragyndan, Eýranyň eziz halkyna ýüzlenýärin. Çünki goňşy ýurt hökmünde bizi biri-birimize baglaýan çuňňur taryhy, medeni we ynanç köklerimiz şeýle berkdir welin, olaryň öňünde geografik serhetleriň ähmiýeti ýokdur.

Men dil we edebiýat mugallymy hökmünde şu günki agyr günlerde gynanjymy paýlaşmak üçin kiçijik hem bolsa öz goşandymy goşmagy borjum hasap edýärin. Eýranyň Yslam Ynkylabynyň beýik ýolbaşçysy, Hezret Aýatolla Seýit Ali Hameneýiniň şehit bolandygy baradaky habar diňe Eýranyň halkyny däl, eýsem serhediň beýleki tarapyndaky dostlaryny we ýürekdeşlerini hem çuňňur gama batyrdy. Ol diňe bir dana ýolbaşçy bolman, eýsem beýik edebiýat söýüjisi, mähirli ata we kämilligiň ýoluny gözleýänleriň ählisi üçin parasatly ýol görkezijidi.

Biziň umumy ruhy we medeni mirasymyzda ölüm soň däl, eýsem bakylyga uçuşdyr. Biz söýgüden, ahlakdan we beýik şahyr hem akyldar Magtymguly Pyragynyň öwütlerinden ruhlanýarys. Ol öz goşgularynda halklaryň jebisligini, dostlugyny, parahatçylygyny we Pygamberimiziň (s.a.w.) mübärek Ähli-beýdine bolan söýgüni hemişe wasp edipdir.

Şu gün şol dana ýolbaşçynyň belent pikirlerine we gymmatly tagallalaryna seredenimizde, Magtymguly Pyragynyň diwanynda joşup duran parahatçylyk, adamkärçilik we ruhy gözellik baradaky arzuwlaryň şöhlelenmesini görýäris. Bu umumy gymmatlyklar beýik pikirleriň hiç wagt serhetler bilen çäklendirilmeýändigini görkezýär. Bu gün ýüreklerimiz bu agyr ýitgä gynanýan bolsa-da, onuň bize galdyran ahlak mirasy, ýagşy pikirleri we ýagşy ady halklaryň kalbynda hemişelik ýaşar. Çünki, beýik Hafyz Şirazynyň aýdyşy ýaly: «Söýgi bilen dirilen ýürek hiç haçan ölmez; biziň baky sahypamyzda onuň ady ebedilik ýazylgydyr.»

Şu sözler bilen men Türkmenistandaky goňşy halkyň wekili hökmünde Eýranyň eziz halkyna çuňňur gynanjymy bildirýärin. Beýik Biribardan asylly Eýran ýurduna parahatçylyk, mertebe, abadançylyk we dostlugyň hemişelik dowam etmegini dileýärin. Goý, parahatçylygyň we doganlygyň saýasy iki halkyň üstünde hemişelik bolsun! Goý, onuň belent ruhy Allanyň rehmetinde şat bolsun we ruhy baky ýaşaýşa gowuşsyn.

EYR-nyň Türkmenistandaky ilçihanasynyň Medeniýet merkeziniň mugallymy Kümüş Agaýewa

Bu gün Biz Yslam dünýäsinde öz adyny müdimi altyn harplar b-n ýazan şahsyýeti ýatlaýarys. Şu gün hemmämiz jemlenşip oňa doga-dileg ederis. Elbetde Şehit Hameneyi özüniň aýratyn şahsyýetdigini subut etdi. Şunda özüni mert, gaýtduwly, watansöýiji, yslam dininiň bir bölegi, ökde syýasatçy hökmünde bütindünýä tanatdy. Ol näçe kyn hem bolsa öz eýran halkyny uly ösüşlere äkitdi. Eýranyň häzirki wagtda bu lider bilen ýeten sepgidine köp döwletler haýrana galýar. Ol 1939-njy milady (1318-nji hijri şemsi) ýylynda Maşat şäherinde eneden bolýar. Onuň ölümi köp musulman döwletleri üçin uly ýitgi. Onuň ömür ýoly häzirki ýaşlar üçin hem uly nusgalyk diýip bileris. Eýran halkynyň beýik ogly şehit Seýit Hameneýiniň ruhy şat bolsun!

7-nji kurs pars dili öwrenijisi Melewşe Durdyýewa

Salam men Melewşe. Eýranyň beýik Ruhy Lideri Aýatolla Seýed Aly Hameneýiniň şehit bolandygyny baradaky habar ähli musulmanlaryň we goňşularyň ýüregini lerzana getirdi. Türkmen halky ýakyn goňşy we dogan hökmünde eýran halkynyň agyr hem çuň gynanjyna şäriklik edýär. Iki ýurduň arasyndaky taryhy we medeni gatnaşyklar geografiki çäklerden has giňdir we bu şäriklik iki ýurduň arasyndaky dsotlukly çuň baglanyşygyň alamatydyr. Aýatolla Hameneýi diňe bir syýasy we dini Lider däldi, eýsem, Yslam äleminiň ösmegi we mazlumlary goramak üçin köp zähmet çeken beýik şahsyýetdir. Ol türkmenleriň arasynda pähimli, sebitde durnuklylygy we asudalygy saklaýjy şahsyýet hökmünde tanalýardy. Türkmenistanyň halky hem onuň Yslamy garaýyşlaryna we milletleriň arasyndaky doganlyk gatnaşyklaryny ösdürmekde çeken zähmeti üçin uly hormat goýýar. Türkmen halky üçin gowy goňşy maşgala agzasy ýalydyr. Şu kyn günlerde türkmen halky hem onuň üçin beýik Allatagaladan beýik derejeler we ylahy rehmet dileýärler. Biz bu beýik Lideriň adynyň taryhda ebedi galjakdgyna ynanýarys. Bu şehit diňe bir eýran halky üçin däl, eýsem, sebitdäki ähli milletler üçin hem uly ýitgidir. Beýik Allatagaladan asylly eýran halky üçin sabyrlylyk dileýäris we onuň ýoly bolan ösüş, parahatçylyk we doganlyk ýoly uly depginde öňe gider diýip umyt edýäris. Ruhy şat, ýatan ýeri ýagty bolsun.

10-njy kurs pars dili öwrenijisi Hatyja Geldimämmedowa

Salam hormatly mugallymlar we eziz dostlar. Men Hatyja. Bugün gam-gussaly kalplar we kyn günleri ýatlaýan gözler bilen bir – biregiň ýanynda jemlendik. Ymam Hameneýi ady umyt, iman we durnuklylyk bilen hemişe ýreklerde diri bolan şahsyýetdir. Ol adamlara hat-da kyn günde hem umydy elden bermezligi we hakykat ugrunda zähmet çekmegi öwretdi. Biz Türkmen halky bugün eýran halkynyň derdine şäriklik edýäris. Aralyklar möhüm däl. Bir – birekden kilometrler uzakda bolsak hem ýürekler ýakyn bolup bilerler. Bugün biz şol şahsyýetiň hatyrasyna dymýarys. Ymam Hameneýi bize mähirliligi, adalatlylygy we adamkärçiligi unutmazlygy öwreti. Biz hem okuw okamak bilen, başgalara kömek etmek bilen, has hem gowy bolmak bilen bu ýoly dowam etdirjekdigimizi söz berýäris. Siz hemişe bizi ynamlylyga, durnuklylyga we öz güýjümize daýanmaga çagyrdyňyz we bir milletiň şöhraty onuň garaşsyzlygy we agzybirligi esasynda emele gelýändigini ýatlatdyňyz. Biz hem üznüksiz zähmet bilen ýurdumyzyň abadançylygy we ruhubelentligi üçin gadam urjakdygymyza äht edýäris. Ymam Hameneýiniň ady hemie ýüreklerimizde diridir. Ruhy şat, ýatan ýeri ýagty bolsun.

7-nji kurs pars dili öwrenijis Nurana Amanmyradowa

Beýik Allanyň ady bilen. Salam, men Nurana. Aýatolla Hameneýiniň şehit bolandygy baradaky habary eşdenimizde biziň kalbymyzda çuňňur gaýgy döredi. Adalatlylyk we ähimlilik bilen garaşsyzlygy we ösüş ýoluny ýöredýän Lideriň şehitligi adalatyň we erkinligiň tarapdarlary üçin agyr ýitgi bolup, olaryň kalbynda uly gaýgy döretdi. Onuň saýasy bu topragyň üstünde hemişe durar we onuň ady halkyň ýüreginde baky galar.

Aly Hameneýiniň ady türkmen halkynyň ýadynda hemişelik galar. Onuň ýaly ertiriň umydydyr. Ol söýgüsi biziň ýüreklerimizde bolan mert Liderdi. Onuň wepalylygy we sabyrlylygy kyn gijelerde durnuklylygyň we ýagtylygyň dersidi.

 Taryhyň sahypalarynda siziň adyňyz sabyrlylyk we durnuklylyk bilen iň kyn tupanlarda musulmanlaryň kalbynda umyt çyragyny söndürmän saklamagy başaran Lider hökmünde ýazylandyr. Siziň adyňyz we Liderlik ýoluňyz kalplarda baky galar. Ruhy şat, ýatan ýeri ýagty bolsun.

1-nji Eýranşynaslyk kursunyň pars dili öwrenijisi Bibihajar Kadyrowa

Eý, asmanyň ýadygärligi!Her gezek adyň dile gelende, garaňkylykda ýoly görkezýän bir ýagtylygy görýärin.Sen bize ynanç ugrunda berk durmagy we pida bolmagy öwretdiň. Biz seni küýseýäris, emma seniň barlygyňa her pursatda buýsanýarys.Seniň sesiňi ýene bir gezek eşidip, pähimli sözleriňden rahatlyk tapyp bilsedik!Sen gitdiň, emma ýatlamalaryň bu halkyň kalbynda diridir we olara aň-düşünjäň hem-de ynamyň aýdyň ýoluny görkezýändir.Ruhuň şat, adyň ebedi bolsun, eý belent mertebeli şehit!

7-nji kurs pars dili öwrenijisi Hatyja Toýlyýewa

Salam men Medeniýet merkeziň okuwçysy Hatyja. Uly gynanç bilen Eýranyň we Yslam äleminiň beýik Lideri Hezret Aýatolla Seýed Aly Hameneýiniň bakyýete göç etmegi we şehit bolandygy baradaky habary eşitdim. Bu agyr ýitgi sebäpli asylly eýran halkyna we bütin dünýädäki musulmanlara duýgudaşlyk bildirýärin.

Dünýädäki her bir ýeňiş we her bir gazanylan üstünlik uly, agyr pidalary talap edýär. Özüniň 87 ýyllyk ömründe ähli zadyny Yslam dininiň we asylly eýran halkynyň ösmegi üçin bagyşlap, ahyrsoňunda öz arzuwlary we ideologiýasy üçin janyny pida eden bu beýik şahsyýet hiç haçan eýran milletiniň ýadyndan çykmaz.

Men Türkmenistanyň bir sada ýaşaýjysy we bir musulman dogan hökmünde öz çuňňur gynanjymy bildirýärin we beýik Allatagaladan şehit üçin beýik derejeler, ylahy öwlatlar bilen oturmagy, Eýranyň beýik milletine bolsa sabyr dileýärin. Ruhy şat, ýatan ýeri ýagty bolsun.

1-nji Eýranşynaslyk kursunyň pars dili öwrenijisi Güneş Orazmuhammedowa

Salam men Güneş. Şehitlik soňlanma däldir, eýsem, ylahe rehmetiň başlangyjydyr. Haçan-da Allanyň ýolunda uruşýan adam bu dünýäniň ähli gymmatlyklaryndan geçende, "Allanyň ýanynda ryzklandyrylýan" diýen belent derejä eýe bolýarlar.

Beýik Homeýniniň mekdebinde we Yslam Ynkylabynyň Şehit Lideriniň sözlerinde şehitlik ýeňiliş ýa-da hasrat däldir, eýsem, ýeňşiň we bagtyýarlygyň iň ýokary derejesidir. Şehit özüniň arassa ganyny topraga dökmek bilen azatlygyň we durnuklylygyň nahalyny suwarýar hem-de Yslam dünýäsiniň beýik maksatlaryny we mertebesini goramak üçin janyňdan hem geçmelidigini öwredýär.

Bu ajaýyp göwheri gazanmak üçin Allatagalanyň gaşynda dogruçyllykdan we imandan doly ýüregiň bolmagy gerek. Şehitler Gurhanyň aýatlarynyň janly düşündirilişidirler. Öz janlaryny pida edenler, onuň garşylygyna ylahy razylygy gazanýarlar. Şehit Ymam Hameneýiniň gany bilen dowam edýän bu ýol Muhammet ymmatynyň barlygynyň we güýç-gudratynyň kepilidir we olaryň ýatlamasy geljekki nesilleriň ýoluny ýagtyltjak nur bolar.

1-nji Eýranşynaslyk kursunyň pars dili öwrenijisi Nurjahan Mahmudowa

Käşgä, şu pursatlaryň barysy diňe bir düýş bolan bolsady. Käşgä, Siz hiç haçan biziň aramyzdan gitmedik bolsadyňyz. Eziz Ýolbaşçym! Siz nähili ajaýyp ömür sürdüňiz we nähili belent mertebe bilen hem bu dünýä bilen hoşlaşdyňyz. Ýöne bir zady biliň: men diri wagtym Siziň ýoluňyzy dowam etdirerin. Diňe men däl, eýsem geljekki nesilleriň ählisi hem Siziň beýik ýoluňyzy dowam etdirer.

Men hemişe Siziň nurana ýüzüňizi görmek, Sizi ýakyndan zyýarat etmek arzuwyny etdim. Emma bu miýesser etmedi. Görnüşinden, men Sizi görmek bagtyna mynasyp bolmandyryn.

Beýik Biribaryň huzurynda, o dünýäde Size gowuşyp, Sizi zyýarat etmek miýesser eder diýip umyt edýärin.

10-njy kurs pars dili öwrenijisi Döwletýar Ýüzbaşyýew

Salam hormatly myhmanlar, hanymlar we jenaplar, mugallymlar we pars dili öwrenijiler. Men EYR-nyň Türkmenistandaky Ilçihanasynyň Medeniýet merkeziniň pars dili öwrenijisi Döwletýar Ýüzbaşyýew. Men size ýazan makalamy okap bermek isleýärin.

Gadymy taryhy we uly ýeňişleri bolan Eýran, öz Watanyny goramak ugrunda batyrlyk bilen söweşen we şehit bolan edermen ynsanlaryň mekanydyr. Şol gahrymanlar beýik Allanyň ýanynda gadyrly we ezizdirler hem-de geçmişde we geljekde baky galjakdyrlar. Olar hiç wagt unudylmady we unudyljak dääldirler.

Mübärek Remezan aýynda şehit bolan EYR-nyň Ruhy Lideri Aýatolla Seýed Aly Hameneýiniň gahrymançylyga baý bolan durmuşy hem şöhratlydyr. Ol dünýä parahatçylygy, sebitdäki adalatlylyk we Eýran halkynyň ösüşi ugrunda uly işleri amala aşyran beýik gahrymandyr. Onuň watansöýüjilik, gahrymançylyk we batyrlyk ýoly hakykatdan hem beýik ýoldur.

Men pars dili öwreniji we Türkmenistanyň raýaty hökmünde, bu beýik Lideriň şehit bolmagy sebäpli ähli eýran halkyna çuňňur gynanjymy bildirýärin.

7-nji kurs pars dili öwrenijisi Hajymyrat Abdyrahmanow

Men EYR-nyň Türkmenistandaky Ilçihanasynyň Medeniýet merkeziniň okuwçysy Hajymyrat. Çäksiz gam-gussa bilen Ruhy Lideriň şehit bolandygy baradaky habary aldym we bu ulu ýitgi sebäpli asylly eýran halkyna duýgudaşlyk bildirýärin. Ol öz ömrüniň köp ýyllaryny öz halkyna hyzmat etmek we jemgyýeti dolandyrmak üçin sarp etdi. Bu agyr we kyn günlerde özümi eýran halkynyň agyr derdine şärik hasaplaýaryn. Beýik Allatagaladan şehit üçin ylahy rehmet we hormatly maşgalasyna sabyr dileýärin. Biziň milletlerimiziň arasyndaky dostluk gatnaşyklary baky mizemez bolar diýip umyt edýärin.

7-nji kurs pars dili öwrenijisi Muhammetnur Ekäýew

Salam, men EYR-nyň Türkmenistandaky Ilçihanasynyň Medeniýet merkeziniň okuwçysy Muhammetnur. Men size öz makalamy size okap bermek isleýärin. Türkmen halky öz goňusyna örän uly hormat goýýar. Aýratyn – da, umumy taryhy we medeniýeti bolan goňşusyna. Mübärek Remezan aýynda türkmen halky özüniň şeýle goňşularyndan birini elden gidirdi. Aýatolla Hameneýi diňe bir goňşy däldi, eýsem, garyndaşdy. Ol iki ýurduň, Eýran bilen Türkmenistanyň arasyndaky dostluk we doganlyk gatnaşyklaryny ösdürmekde örän köp zähmet çekdi.

Aýatolla Hameneýiniň şehitligi sebäpli özümiň çuňňur gynanjymy bildirýärin. Bu uly ýitgi sebäpli onuň maşgalasyna, ýakynlaryna we eýran halkyna duýgudaşlyk bildirýärin. Beýik Allatagaladan oňa ylahy rehmet we yzynda galanlara sabyr we rahatlyk bermegini dileýärin.

2-nji Eýranşynaslyk kursunyň pars dili öwrenijisi Selim Annaberdiýew

Beýik Allanyň ady bilen! Men Selim. Bu ýazylanlar Eýranyň şehit Lideri Seýit Ali Hameneýiniň ýagty ýadygärligine bagyşlanyp meniň ýüregimden çykan sözlerdir.

Şu gün men bu ýerde Siz barada sözlemek üçin durun. Siz diňe bir ýolbaşçy däldiňiz. Siz biziň hemmämiz üçin mähirli, aladaly we parasatly ata ýalydyňyz.

Haçan-da Siziň suratyňyza seretsem, kalbym rahatlyk tapýar. Maňa Siz henizem bizi goraýan ýaly duýulýar. Siziň şol mähirli nazaryňyz maňa kynçylyklaryň öňünde ruhdan düşmezlige güýç berýär.

Siziň geçen ýoluňyz beýik ýol boldy. Siz bize güýçli bolmagy öwretdiňiz. Kynçylyklaryň öňünde boýun egmezligi, hemişe öz güýjümize daýanmagy we ynam bilen öňe gitmegi öwretdiňiz. Men her gün, hatda iň ýönekeý işlerde-de Size meňzemäge çalyşýaryn. Siz bize mähirli bolmagyň, dogruçyl ýaşamagyň we ynsanperwerligiň durmuşdaky iň beýik gymmatlyklardygyny öwretdiňiz. Siziň bu sapaklaryňyz hemişe biziň bilen galar.

Dünýä örän çalt üýtgeýär, ýöne Siziň bize miras goýan gymmatlyklaryňyz hiç haçan üýtgemez. Siz adamyň hakykaty gorap ýaşamalydygyny, hat-da ýeke galan ýagdaýynda-da Hakdan ýüz öwürmeli däldigini öz göreldäňiz bilen subut etdiňiz.

Siziň ömrüňiz biziň üçin beýik sapakdyr. Biz her gün Siziň paýhasyňyzdan, pähim-parasadyňyzdan we ýol-ýörelgäňizden ugur alýarys. Şol ýol biziň durmuşymyzy ýagtyldýan öçmejek çyra öwrüldi.

Siz häzir Beýik Biribaryň dergähindesiňiz. Emma Siziň ýagty ýadygärligiňiz hemişelik biziň ýüreklerimizde ýaşar. Biz Sizi örän küýseýäris. Bize beýik görelde bolanyňyz üçin Size tüýs ýürekden hoşallygymyzy bildirýäris.

• Ymam Hameneýiniň şehitligi we onuň jaýlanmagy bilen bagly birnäçe wideoşekilleriň atlary

1. "Ol öz arzuwyna ýetdi" – Türkmen Halkynyň Milli Lideri hem-de Türkmenistanyň Halk Maslahatynyň Başlygy Gurbanguly Berdimuhamedowyň Eýran Yslam Ynkylabynyň Şehit Lideriniň jaýlanma çäresine gatnaşmagy baradaky wideoşekil
2. "Çagalaryňa seret" atly wideoşekil
3. Maşat, Najaf, Kerbela, Gom we Tähran şäherlerindäki taryhy hoşlaşyk wideoşekili
4. "Hoş gal" atly wideoşekil
5. "Watansöýüji Aga" atly wideoşekil

• Öz makalalaryny ýerine ýetiren mugallymlardyr pars dili öwrenijilerini sylaglamak
• 9-njy kurs pars dili öwrenijisi Aýsoltan Baýramowany Şehit Ymamyň suratyny çekenligi üçin sylaglamak