Aşgabatda Halkara Ynsanperwer ylymlary we ösüş uniwersitetiniň mejlisler zalynda, ýokary okuw jaýynyň ýakyndan hyzmatdaşlygy bilen  “Pars şygryýeti, edebiýaty we Şahriýary ýatlama” çäresi geçirildi.

    2-nji okatýabrda (10-njy mehr) geçirilen bu dabaraly çärä Eýran Yslam Respublikasynyň Türkmenistandaky ilçisi Golam Abbas Arbap Hales, Medeniýet meseleleri boýunça geňeşçisi Nawid Rasuli, ilçihananyň işgärleri, Halkara Ynsanperwer ylymlary we ösüş uniwersitetiniň rektory Esen Aýdogdyýew, ýokary okuw jaýynyň mugallymlary, talyplary, Eýranyň Medeniýet merkeziniň işgärleri we pars dili öwrenijileri gatnaşdylar. Çäräniň başynda Halkara Ynsanperwer ylymlary we ösüş uniwersitetiniň rektory Esen Aýdogdyýew hemmelere hoş geldiňiz diýip, iki goňşy döwletiň arasyndaky gatnaşygyň ösdürilmeginiň Türkmenistanyň daşary syýasatynyň esasy ugry hökmünde belläp, iki ýurduň ýolbaşçylarynyň Türkmenistana we Eýrana amala aşyran saparlaryna ünsi çekip, şeýle diýdi:

    1992-nji ýylyň 18-nji fewralynda ýola goýulan diplomatik gatnaşyklaryň esasynda häzirki wagtda Türkmenistan we Eýran dürli ugurlar boýunça iki tarapyň hem milli bähbitlerine doly laýyk gelýän hyzmatdaşlygy täze derejä çykarýarlar. Iki ýurduň ýolbaşçylarynyň resmi saparlary we olaryň çäginde geçirilýän duşuşyklar iki ýurduň arasyndaky gatnaşyklaryň has-da pugtamagyna ýardam edýär.

    Ol sözüni dowam edip, “Pars şygryýeti, edebiýaty we Şahriýary ýatlama” çäresiniň ýokary okuw jaýynda geçirilýändiginiň guwandyryjy wakadygyny belläp, şeýle diýdi: Şular ýaly çäreleriň geçirilmegi dostlukly Eýran döwletiniň taryhy we medeniýeti bilen ýakyndan tanyşmaga mümkinçilik döredýär. 

    Soňra Eýran Yslam Respublikasynyň Türkmenistandaky ilçisi Golam Abbas Arbap Hales dili – adamlaryň arasyndaky aragatnaşygyň Hudaý tarapyn iberilen iň möhüm serişdesi diýip belläp, şeýle diýdi: Durmuş, medeniýet, ylym, ösüş we adamzadyň kämilleşmegi dil arkaly kemala gelýär. Diliň edebi gurluşy we many taýdan baýlygy näçe kämil, doýgun bolsa, onuň adamlar arasyndaky, edil şonuň ýaly – da jemgyýetler arasyndaky täsirliligi şonça ýokary bolýar. 

    Ilçi çykyşyny dowam edip, şeýle diýip belläp geçdi: Pars dili söýginiň, mähir – muhabbetiň dilidir, dostlugyň, ýürekdeşligiň dilidir, içki duýgulary, ruhy liriki düşünjeler bilen utgaşan joşgunlary beýan etmegiň dilidir.  

    Eýran Yslam Respublikasynyň Türkmenistandaky ilçisi sözüniň soňunda türkmen we pars dilindäki umumylyklara ünsi çekip, şeýle diýdi: Bu dil we söz umumylyklary pars we türkmen medeniýetleriniň arasyndaky umumylyklaryň özenini berkidýär we iki ýurduň halklarynyň arasyndaky has ýakyn we ýürekdeş gatnaşyklary döretmek bilen iki ýurduň goňşuçylyk we garyndaşlyk arabaglanşygyny we halklarymyzy öňküden - de jebisleşdirdi.

Eýran Yslam Respublikasynyň Medeniýet meseleleri boýunça geňeşçisi Nawid Rasuli öz çykyşynda Halkara Ynsanperwer ylymlary we ösüş uniwersitetinde bellenilýän “Pars şygryýeti, edebiýaty we Şahriýary ýatlama” çäresi barada belläp, şeýle diýdi: halklaryň arasynda medeni gatnaşyklaryň ösmegi birek biregi has-da ýakyndan tanamak arkaly başlanýar we ýokary okuw jaýy merkez hökmünde iki ýurduň arasyndaky medeni gatnaşyklaryň ösmeginde möhüm orny eýeleýär.

Ol sözüni dowam etdi: Türkmen dilinde 2000-e golaý pars sözleriniň barlygy sebäpli, Pars dilini 2 döwletiň arasyndaky medeni umumylyklaryň biri diýip hasaplap bolar. Pars dili we onuň ulanylýan ýerleri, şahyrlar we suhangöýler bize, ýagny şu günki we geljekki nesiller üçin we bütin dünýä ýüzi üçin gymmatly miras galdyrdylar. Onuň üsti bilen adamyzadyň beýik maksatlaryna ýetmeklikde uly orun eýeleýän Rudaki, Ferdöwsi, Saadi, Hafyz, Möwläwi, Nyzamy, Naser Hosrow, Attar Nişapuri ýaly akyldarlaryň we başgada meşhur şahyrlaryň ajaýyp pikirleri beýan edilýär.

Jenap Rasuli çykyşynda Ostad Şahriýary şahyr, akyldar, pars edebiýatynyň we şygryýetiniň görnükli wekili, hoşniýetliligiň, parahatçylygyň habarçysy diýip aýdyp, sözüni dowam etdi: Şahriýar goşgularynda esasy mowzuk hökmünde ynsanlara rahatlyk berýän temalary ullanyp, adamlaryň arasynda özüniň parahatçylyk, barlyşyk, dostluk we jemgyýet üçin gowy netijelerine ýugrulan goşgulary bilen çykyş edýärdi.  Başga sözler bilen aýdylanda, Şahriýaryň goşgulary eýran tire - taýpalarynyň arasyny berkitmekde täsirli bolup, Eýranyň we Türkmenistanyň halklarynyň arasynda parahatçylyk we dostlukly gatnaşyklary döretmekde möhüm bolupdyr.

Nawid Rasuli sözüniň soňunda şeýle diýdi: geljekde Eýranyň Medeniýet Merkezi, Halkara Ynsanperwer ylymlary we ösüş uniwersiteti bilen birlikde beýik şahsyýetleri we 2 döwletiň medeniýetini birek – birege açyp görkezmekde birnäçe çäreleri geçirer diýip umyt edýärin.

Dabaraly çäräniň dowamynda  “Pars şygryýeti, edebiýaty we Şahriýary ýatlama” gününe degişli wideoşekil, sahna oýuny ýerine ýetirilip, Eýranyň Medeniýet Merkezi, Halkara Ynsanperwer ylymlary we ösüş uniwersitetiniň mugallymlary, talyplary we Pars dili öwrenijileri tarapyndan goşgy, makalalar we başgada gyzykly çykyşlar ýerine ýetirildi.

Şeýle hem çärede ýokary okuw jaýynyň ýolbaşçylaryna, talyplaryna, çärede çykyş eden pars dili öwrenijilere ýadygärlik sowgatlary gowşuryldy. Ýokary okuw jaýynda geçirilen çärede iki ýurduň el işleri sungatyna degişli umumy sergi gurnalyp, ýurdumyzyň ilçisi we ýokary okuw jaýynyň rektorynyň orunbasary sergä aýlanyp gördüler.

Çäräniň soňunda iki döwletiň naz – nygmatlary hemmelere hödür – kerem edildi.