Halkara zenanlar güni mynasybetli Aşgabatdaky Jemgyýetçilik guramalarynyň merkezinde Zenanlar birleşiginiň Merkezi geňeşiniň we Eýran Yslam Respublikasynyň Türkmenistandaky ilçihanasynyň Medeniýet merkeziniň bilelikde guramagynda «Zenanlaryň maşgalanyň binýadyny berkitmekdäki orny» atly duşuşyk geçirildi. 

Çäräniň başynda Türkmenistanyň Zenanlar birleşiginiň Merkezi Geňeşiniň Guramaçylyk we medeni-köpçülik işleri bölüminiň müdiri Orazowa Enemjan Eýrandan gelen myhmanlara hoş geldiňiz diýip, şeýle diýdi: Türkmen zenanlary çaga terbiýesiniň esasyny düzýän maşgala binýadyna, ata-babalarymyzyň öwütlerine we paýhasly däplerine hemişe ähmiýet beripdirler. Hormatly Prezidentimiz, ene-atamyzyň we maşgalamyzyň mertebesine hormat goýýan halkdyrys, diýip belläp geçýär. Döwlet baştutanymyzyň paýhasly sözleri ene-atalaryň we maşgalanyň mukaddesliginiň tutuş halkyň mertebesi bilen berk baglanyşyklydygyny tassyklaýar. Bu hakykat, türkmenleri we eýran halklaryny ýakynlaşdyrýan medeni umumylyklaryň biridir.

Ol sözüni dowam etdi:  Türkmenistanyň başlangyjy bilen Birleşen Milletler Guramasynyň Baş Assambleýasy tarapyndan 2025-nji ýylyň “Halkara Parahatçylyk we Ynanyşmak ýyly” diýlip yglan edilmegi, halkymyzy uly maksatlara iterýär we möhüm wezipeleri öňünde goýýar. Bu ýyl garaşsyz Türkmenistan ajaýyp dabaralar we taryhy wakalar bilen bilelikde hemişelik bitaraplygynyň 30 ýyllygyny giňden bellär. Bu ýyl, her bir raýatyň we tutuş ýurduň ykbalynyň ösüşi we üýtgemegi garaşsyz topragymyzyň, parahatçylygyň we ynamyň watany bolan täze taryhymyzda altyn harplar bilen ýazylar. Ýurdumyzdaky aýallar asylly işlere işjeň gatnaşýarlar we parahatçylyga we howpsuzlyga tarap köp taraply tagalla edýärler.

Türkmenistanyň Zenanlar birleşiginiň Merkezi Geňeşiniň Guramaçylyk we medeni-köpçülik işleri bölüminiň müdiri sözüni dowam etdi: Gymmat bahaly medeni we ynsanperwerlik gatnaşyklary, Türkmenistan bilen Eýranyň gelin-gyzlarynyň arasyndaky özara hyzmatdaşlygy yzygiderli berkitmek we giňeltmek üçin täze mümkinçilikler açýar. Şu günki çäräniň hem bu ugurda oňyn netije berjekdigine ynanýarys.

Soňra Eýran Yslam Respublikasynyň Türkmenistandaky ilçihanasynyň Medeniýet merkeziniň ýolbaşçysy Ebrahim Parwiz eýran – türkmen zenanlarynyň duşuşygyna gatnaşýan hemmelere hoş geldiňiz diýip, şeýle diýdi: Medeniýeti öwrenijileriň köpüsi, bir jemgyýetiň medeni ýagdaýyny öwrenmek isleseňiz, aýallaryň şol jemgyýetdäki ýagdaýyny, aýallara şol jemgyýetde nähili garalýandygyny we aýallaryň eýeleýän ornynyň nä derejededigini barlamaklygy nygtaýarlar. Bu ugurda Muhammet pygamber (saw) şeýle diýýär: Asylly we edepli erkek adam gelin-gyzlary hormatlaýar, ähmiýetsiz erkek olary sylamaýar.

Ol sözüni dowam etdi: Zenan maşgalanyň iň möhüm aýratynlygy onuň mylaýym we arassa ruhydyr, dini tarapdan Zenan maşgala Taňrynyň gözelliginiň we rehim-şepagatynyň beýanydyr. Dürli döwürlerde beýik aýallar ýüze çykypdyr we üns bilen seretseň, olaryň beýikligi olaryň häsiýetleri bilen baglanyşyklydyr.

 Medeniýet merkeziň ýolbaşçysy maşgalada we jemgyýetde zenanyň orny barada hem belläp geçdi:  Taryhy gurmakda, sagdyn jemgyýet döretmekde we adam ösüşi we kämilligi üçin esas döretmekde aýallar, erkekler bilen deň hatarda uly orun eýeläpdirler. Mähirli, edepli we düşünýän enäniň saýasynda sagdyn, edepli we gowy ahlak terbiýeli çagalar ýetişip jemgyýetiň geljekki nesilleri eýeleri bolýarlar. Mundan başga-da, zenan ýanýoldaş bolmak bilen, karar bermekde we meseleleri çözmekde erkek adam üçin laýyk ruhy we duýgur goldawçy bolup, onuň özüni alyp barşynda we hereketlerinde oňyn üýtgeşmeler döredip biler.

Ol sözüniň soňunda çäräni gurnaýjylara sagbolsun aýtdy: Gelejekde hem iki ýurduň zenanlarynyň bilelikde gatnaşyp geçirjek medeni çäreleriniň yzy üznüksiz bolar diýip umyt edýärin.

Soňra duşuşyk «Parahatçylyk we ynanyşmak — binýatlyk ýörelge», «Çaga terbiýesi — röwşen geljegiň binýady», «Telekeçi zenanlar ykdysadyýetiň ösüşinde» atly temalar boýunça özara pikir alyşmalardyr maslahatlar bilen dowam etdi.

Belläp geçsek, çäräniň barşynda medeniýet we sungat şeýle hem el işleri eserleriniň sergisi gurnaldy. Çärä gatnaşýanlar dabaranyň başynda el işleri we amalay – haşam sungatynyň eserleri bilen ýakyndan tanyş boldular.